Uitroepen Prins Jean I

 

Leef Luuj van Austroa!

Mit die wuurd aopende Jan Clement van de awt Parkuule ummer zien toesjpraoke. Toen ich nog ‘n menke waor van ‘n jaor of acht…

Veur diegene die mich nog neet kinne, ich bin de awtste zoeën van Jef en Ria, braor van Edwin en Jacques en nonk van Randy en Eline. Es baby gewoeënt op de Heiberg biej tant Louise, daonao nao de Vonksjtraot verhoest, in 1978, weer truuk nao de Heiberg en in 1989 naa de Hagendorenwaeg verhoest mit mien auwersj.

Ich woeën al zoeën 23 joar samen mit mien vrouw Miriam en vier zint ‘n jaor of zieëven gelaeje getrouwd. Jaore lank sjpieëlend lid gewaest van de voetbalvereniging in Austroa, dao ooch in ‘t besjtuur gezaete, en noe noch ummer neet sjpieëlend lid. Lid van de dartvereniging biej Mandy en Patrick en sinds kort aspirant lid van de sjötterie. Namens Austroa betrokken geweas bie ‘t Zeskerkdorpen Sjpel van Sjitterend Sjènne. Diks in Austroa es d’r get te doeën is, ooch toen ich d’r neet miej woeënde. ‘T veulde ummer es thoeskomme.

Ich wirk veur ‘n organisatie die zich bezig hilt mit ontwikkelingshulp, geen noodhulp mer faciliteiten veur de langere termien. Dat doeën ich al zoeën 15 jaor mit väöl toewijding en energie. Höb bis waal get gezieën van de waereld, ooch väöl ermoeë en ellende. Es ich noch get tieëd euver höb gaon ich gaer ‘n sjtukske rennen en sjpieël ich op mien basgitaar.

Es menke van ‘n jaor of neuëge leepe mien breurke en ich mit in de optocht, dat is daonao ooch ummer zoe geblieëve. Es Doppelgänger, in kleene en groeëte groepen en es Einelgänger. Druimen oeit ins Prins te kinne zieën, druime komme soms dus toch oet!

‘T begos allemaol mit ‘n bericht van Tom, kin ich dich aeven bellen. Toen de groeëte vroag: Wils se Prins waere van de Parkuule? Euver die vraog hoofde ich neet lang nao te dinke! Jao!!!

Dan begint natuurlijk ‘t ganse sjpel van bieeenkomme, de adjudant vraoge, kleier en de sjteek kopen, ongerscheidingen besjtellen, de proclamatie sjrieve en michzelf vuursjtille aan uch. Tom, Kevin en Roy waore daobiej mien sjteun en toeverloat, bedankt daoveur!

En dan is ‘t natuurlijk wachten op dae groeëte daag, de daag das se oetgeraope wuurs. Wat kinne ‘n paar moandj toch lang doeren… Loesteren in de auto nao vastelaovesmuziek, veural mien favoriete leedje ”Miene Prins” van July en de Muppe, en daagdromen euver de tieëd dae komme geet. Es ’t verheugen net zoe sjoeën is es mien Prinsenjoar, dan belaoft dat get…

Zoeëes ich ooch al in mien proclamatie sjreef hauwt ich waal van ‘n denske, de mieëste luuj weten dat ongetwiefeld. Es d’r urges get te doeën is kin ich lestig sjtil blieve zitten. Mien ganse laeve höb ich vastelaovend gevierd in Austroa, heel diks mit mien nichtske Claudia. Dus sjroom neet en doan gerust mit mich mit.

Ich höb ‘n gedeelte van mien laeve ooch boete, mer waal ummer in de buurt van Austroa gewoeënd. Toch triks se ummer weer truuk nao woe se vandaan kums. Dan dinks se ooch waal ins nao waorum dat eigenlijk zoeë is. Zint ‘t de sjoeën plekskes in ‘t dörp, is  ‘t de bandj mit dien verleden en dien familie? Jao, zieëker ooch waal, mer ‘t belangrijkste zint de luuj die d’r woeëne en  ‘t dörp maken tot wat ‘t is. Vrung, bekinde en klasgenootjes van vreuger, jongens en maedjes waose de kingertied mit höbs doeërgebrach en wao se samen mit gesjport höbs, mit op sjtap gings en plezeer mit höbs gehad. Luuj wao se, es se ze noe taege kums, nog ummer inne mit drinks en herinneringen deels, of de tied haet sjtilgestjange. Luuj die se al dien ganse laeve kins en die noeëit zin verangert. Luuj die deel van dien laeve oetmaken.

Dat ich noe es Prins van dat dörp ‘t kommende jaor kin geneete is ‘n hieële groeëte ieër veur mich! Jongens wao ich vreuger mit omging, jongens die ich vreuger es jungskes getraind höb, allemaol verenigd in de Parkuule!

Ich houp dat vier allemaol ‘n fantastisch jaor taegenmoot gaon en wil gaer aafsjlete mit ‘n dreikreftig Alaaf en mien motto veur de Vastelaovend dat mich ummer aangesjpraoke haet: Awt of jonk, krank of gezondj, alles deet mit!!

Jean I

 

 

UITROEPEN PRINS JEAN I

Met het uitroepen van Prins Jean I op 25 november 2017 is het prinsen trio voor seizoen 2017/2018 compleet.