Aftreden Prins Jean I

TIED VAN GOAN!

Noa un joar geregeerd te hubbe euver ut Parkuuleriek is ooch veur mich binnenkort (24 november a.s.) de tied gekomme miene scepter euver te dragen aan de nuuje heerser. Ich bin net as uch hiel benuujd wae dat geet waere. Wuert ut inne jong oet mien generatie, inne jongere jong of un vrouw as heerseres euver ut Parkuuleriek? Wae zal ut zigge, veer loate os verrassen!

Ut aafgeloape joar woar nogal un joarke veur mich! Bienoa un joar gelaeije waor ut eindelik zoewiet, ich mog michzelf bekendj maken es nuuje Prins van de Parkuule! Achter de buun sjtoan wachten tot ut zoewiet is en dan de zaal insjpringe! Wat un fieës, inne oavendj om noeit miej te vergaete! Dan de veule recepties en fieëskes biej angere verenigingen en mien eigen receptie, ooch weer momenten om noeit miej te vergaete! En dan oeteindelik de sjteek op ut wirk: de Vasteloavend. Wat inne sjneltrein. Inne onvergaetelike oavendj met SieFoe en fantastiese optraedjens! Inne kolderieke playback show op zoaterdig met onvergaetelike momenten. Inne gezellige zundjig biej de Sjepene in Oesjbik en dan op moandig eindelik de optocht. Bovenop dae wagen dringt ut oetkomme van miene druim pas richtig tot mich doer! Deensdig nog inne daag genieten en op woonsdig mit inne hiering aafsjleete.

Ich höb ut ganse joar moge geneete van hiël plezeerig gezelsjap! Prinses Veerle en Prins Levi, wat höbbe veer un geweldig joar moge belaeve samen! Ooch mit miene adjudant Peter en uch adjudanten Kim en Job! Onvergaetelike daag, wat höbbe veer inne sjpas gehad. Dan de Parkuule en aanhang. Kevin en Tom bedankt vuer uch keuze veur mich, ich hoop dat ich aan uch verwachtingen voldoan höb. Tom, Ruud en Roy bedankt veur de sjteun en hulp biej ut kretsen van hot noa her. Oud-Prins Maurice bedankt veur dien adviezen en hulp. De OPA’s bedankt veur de sjoeëne oavendj in Remundj. Road van Elf en de aanhang, wat höb geer mich ut geveul gegaeve dat ich ugge Prins woar! En neet te vergaete alle luuj van Austroa die mien joar höbbe gemaakt tot wat ut gewoere is, un joar om noeit miej te vergaete! Es of ut nog neet genog is sjoot ich mich es prins ooch nog tot Keuning van de sjötterie, ooch get om noeit miej te vergaete! Weer get van mien bucketliest aaf.

De meeste luuj weten waal dat miene pap ut aafgeloape joar euverleje is, get wat mich hiel erg geraakt haet. Ut moment dat mich dan ooch ut meeste geraakt haet is de daag noa mien proclamatie. Noa de jubileumreceptie in Doonder noa Elvira in mien pak om miene pap te vertellen dat ich Prins van de Parkuule woar. Un onoetwisbare herinnering, wat haeij hae dat prachtig gevonge as hae dat nog allemoal haeij mitgekrege. Mer dae blik in zien ogen toen ich vuer huem sjting zei alles…

Veul tied om sjtil te sjtoan biej dinger höb ich neet gehad dit joar, iesj de sjtried om VVA in ut dörp te haute, get wat gelukkig gelukt is, en noe kandidaat veur de verkiezingen van de gemeenteroad in Beekdaelen. Weer get wo ich mich met hart en ziel veur in wil gaon zitte. Dat zit ooch waal in mien persoonlikheed, alles of nieks! Ich hoop dat ich ut vertroewe krieg van genog luuj, dit zin sjpannende tieje! Veer zulle zeen wat de toekomst bringt! Iesj nog mer aeve geneete van de letste evenementen van dit joar en nog un joar mit as Oud-Prins van de Parkuule! Ich vruej mich d’r op! Loate veer der noch ene drinken op un geweldig joar. Hopelik zeen ich uch nog de kommende waeke!

Ugge Prins,

Jean I