Prins Raymond I & Adjudant Guus

Hiej bin ich dan, Prins Raymond I.

Veur degein die mich nog neit kènne, zal ich mich aeve veursjtelle........

Mien naam is Raymond Weinreich en ich bin 47 jaor jongk. Gebaore en getaoge in Treebèk en al 10 jaore woonachtig aan de Holterwaeg 10 in Austroa.

Ich bin getrouwd mit Uschi Wetzels, 'n ech Austraos maedje en bin trotse pap van 3 jongens, Rishano, Stenn en Lowen.

In 't dageliks laeve wirk ich es sjtraotemaaker en sinds 2011 höb ich mien eigen sjtraotemaakersbedrief: Weinreich Besjtraotingen B.V.

Jaorelangk höb ich in mien vrieje tied gevoetbald en noe bin ich dèks te vinje oppe voetbalveldj van V.V. Austroa om mien kinjer te supportere.

Ich hauwt van lekker aete, num regelmaotig deil aan kaok-workshops en höb get mit grote opvallende brille.

Wiejer bin ich groot Formule 1 fan en altied ín veur 'n feeske op lokaase of biej os thoes.

Veer zeen 'n gezin dat gaer Vastelaovend viert. Dat kènt auch neit angesj......Uschi en ich komme oet 'n vastelaovesnes wo vastelaovend viere os mit de paplaepel ingegaeve is....'t zit in os DNA!

Miene pap is vruiger prins van CV De Nonnevotte in Treebèk gewaes en bènne os femiejes zeen os al meerdere prinsen en prinsessen veurgegange.

Zelluf bin ich noe 't 3e sezoen lid van de Raod van 11 van CV de Parkuule.

Wie ich de vraog gesjteld kreeg of ich prins wou waere, vonj ich dat 'n hele eer en haufde ich neit langk nao te dènke en zag geliek 'jao'.

En biej de vraog wae dan mien adjudant moosj waere, dach ich aan miene nonk Guus.

Ich höb al enorm genaote van de aanloup nao de proklemaase en kiek d'r nao oet om mit väöl trots en plezeer dit jaor de scepter te zwejje euver os sjoone Parkuuleriek en d'r saame mit uch 'ne fantastische vastelaovend van te maake!

Alaaf!