Leef luuj van Austroa, 

Veur uch sjteet de nuuje prins van CV de Parkuule. prins Michel de Ieësjte. 

Ich zal mich in dit sjtukske vuursjtèlle, uiteraard kint en mooch geer mich noa dit artikel ooch nog van alles vraoge. 

Miene naam is Michel Meers, 39 joar jonk, bin getrouwd mit Dewi Schmeits, de dochter van brandjwaerman Willie. Veer wone same aan de Hoofdsjtraot van Austroa mit oze dochter Gwenn (Jeugdprinses Gwenn de Ieësjte) en mien sjoenmam Annelies. 

Ich bin gebaore in Gebrook en hub bienoa mien ganse laeve dao gewoond, sinds een paar jaor woon ich in Austroa in ut awwesj hoes van Dewi, óm good in te börgere bin ich bie de Sjötterie van Austrao gegange en loup noe mit es gewaerdrager. Sinds kort bin ich ooch de Penningmeister van de Sjötterie. 

Mien wèrk doon ich in de Microbiologie, ich bin geine microbioloog mèr technisch medewirker, hie veur mot ich hièl väöl rieje mit de wage door gans Europa en wen ich neet mit de wage dao kin komme gaon ich mit ut vleegmesjien of mit de boot. 

Hièl lank probeer ich mich al in te zètte veur de vastelaovend, ich bin 11 jaor bie carnevalsgroep/ wageboewers de Hopduvelkes gewaes en hub same de groatste optochwages geboewt. 

Doabie zit ich alweer ein tiedje bie de hoesverseerders van CCH die het hoes versere van de Sjtadsprins van Gebrook. Zal ich dit jaor mien eigen hoes motte versere? 

Mien leefhöbberieje zint hièl divers, zo gaon ich in de zomer gaer mit de tractor rieje en doon ich gaer get wèrk in de haof, in de wèntjer bin ich bezig mit de iezerbaan op de zölder. Es ich tied hub, doon ich get volleyballen of sjpeel ich mit de kleine meid (klein is ut neet miè). Sjnachts kènt geer mich wakker make veur ein sjtök vlaai, geine billige mèr ein ech sjtök. 

Sezoen 2023/2024 is ut jubbeleijaor van de Parkuule, 2×11 jaor en ich mooch dit jaor veurop loupe same mit miene adjudant Pablo Borger, jeugdprins Jesper de Ieësjte en jeugdprinses Gwenn de Ieësjte. Veer haope same mit uch eine sjoane Vastelaovend d‘rvan te make! 

Mit Austroa! Alaaf!        Prins Michel 1